Soltüstık Казахстан
Мемлекеттік қызмет істері агенттігі облыстық департаменті “Жас мемлекеттік қызметшілер мектебіне” қабылдауды бастады. Жобаның мақсаты – мемлекеттік қызметке кіру үшін әлеуетті кандидаттарды дайындау. Мектепте білім алуға М.Қозыбаев атындағы Солтүстік Қазақстан университеті, Солтүстік Қазақстан кәсіптік-педагогикалық колледжі, гуманитарлық-техникалық колледжінің бітіруші курс студенттерінен 46 өтініш түсті. Олардың қатарында М.Қозыбаев атындағы университеттің 4-ші курс студенті Айша Мұхаммадаминова да бар. Тарих, экономика және құқық факультетінде білім алып жатқан жас болашағын мемлекеттік қызметпен байланыстырмақшы.
“Жас мемлекеттік қызметшілер мектебі” департамент жанында 2018 жылдан бастап жұмыс істейді. 8 маусым сәтті жүзеге асырылды, оған 103 студент қатысып, 20 пайызы оқуын тамамдағаннан кейін мемлекеттік қызметке орналасты. Жоба екі кезеңнен тұрады. Әуелі Президент жанындағы мемлекеттік басқару академиясының филиалында заңнаманы білуге арналған дәрістер мен құзыреттерді дамытуға арналған тренингтерге қатысады.
Екінші кезеңде мемлекеттік органдарда өндірістік тәжірибеден өтеді. Оның соңында мемлекеттік органның басшысы қатысушы туралы пікір береді. Бұдан кейін тыңдаушылар заңнаманы білу және жеке қасиеттерін бағалау үшін тестілеуден өтеді.
Маусым айында оларға мектепті бітіргендері туралы сертификаттар беріледі, оны тыңдаушылар “Б” корпусының бос мемлекеттік әкімшілік лауазымдарына конкурстық рәсімдерге қатысу кезінде қосымша құжат ретінде ұсынады. Жас мемлекеттік қызметшілер мектебін сәтті тамамдағандар облыстың таланттар пулына қабылданады.
– Биылғы жылы университетте грант бойынша білім алып, жақсы бағамен тамамдаған студенттерге конкурстан тыс мемлекеттік қызметке орналасуға мүмкіндік беріледі. Олар бізде оқуды бітіріп, ешқандай конкурссыз жұмысқа тұра алады, – деді Мемлекеттік қызмет істері агенттігі облыстық департаментінің басшысы Дулат Тайшабай.
Үстіміздегі жылы университетті бітірген бес жас маман мемлекеттік конкурстан тыс Айыртау, Аққайың, Мағжан Жұмабаев, Жамбыл аудандарына жұмысқа орналасыпты. Бүгінгі таңда өңіріміздің мемлекеттік қызмет саласында 200-ге жуық бос жұмыс орны бар.
Самрат ҚҰСКЕНОВ,
“Soltüstık Qazaqstan”.