Soltüstık Казахстан
Қалалық әкімдік қабырғасында өткен жиында шаһардағы ойын-сауық мекемелерінде құқық бұзушылық көбейгені жайлы айтылды. Прокуратура өкілдерінің сөзінше, Петропавлда күні-түні жұмыс істейтін көңіл көтеру орындары бар. Олардың басым бөлігінде ішімдік сатылады. Заңға қайшы әрекеттер де осы шайтансудың кесірінен орын алады екен. Бұл арнайы талдау кезінде анықталыпты.
– Биыл 28 адам әкімшілік жауапкершілікке тартылды. Қалада 700-ге жуық адамның алкогольдік өнімдерді сатуға лицензиясы бар. Біз оларға мониторинг жүргіздік. Сол кезде бұрын лицензиясынан айырылып, бертін келе оны қайтадан алған сатушылардың құқық бұзушылықтарға жол бергені анықталды, – дейді қалалық прокуратураның тергеу бөлімінің басшысы Азамат Жүсіпов.
Бұған қатысты кәсіпкерлердің айтар өз уәжі бар. Олардың сөзінше, тиісті талаптарды сақтауға көп сатушының мүмкіндігі жоқ екен.
– Олар тек ақша табу үшін жұмыс істейді. Пандемия кәсіпкерлік саласына ауыр соққы болып тиді. Бүгінде әріптестерімнің барлығы бірдей сауда немесе қызмет көрсету нүктесін ашып, жөндеу жүргізіп, жоғары деңгейдегі бизнеспен айналыса алмайды. Кемшіліктер осы себептен туындап отыр. Мұны да түсіну керек, – дейді облыстық рестораторлар мен мейманханалар қауымдастығының төрағасы Сайран Хамзин.
Бүгінде қаладағы 20-дан астам дәмханада бейнебақылау құралы жоқ. Бұл да тәртіпті сақтауға кедергі келтіріп отыр. Аталған мәселені қаузайтын жиын алдағы уақытта жалғасын таппақ. Оған жиі құқық бұзатын орындардың басшылары арнайы шақырылады.
Гүлден СЕМБАЕВА.