Soltüstık Казахстан
Облыстың емдеу мекемелері биыл 201 маманмен толықты. Қараша айынан бастап келген дәрігерлерге берілетін бір реттік көтермеақы мөлшері өсті. Енді білікті маман ауылға барған жағдайда 5 млн. Петропавлда қалса 3,5 млн. теңге алады.
Өскемен қаласының тумасы Сауыр Тоқтарбай – Астана медициналық университетінің түлегі. Ол облыс әкімінің грантын жеңіп алып, резидентурада анестезиолог-реаниматолог мамандығын меңгерген. Жас маманның облыстық перинаталдық орталықта жұмыс істеп жатқанына 3 ай болды.
“Маған бұл орталықта жұмыс істеу ұнайды, басшылық жауапкершілікті талап етеді. Ұжым да жақсы қарсы алды. Жуырда маған облыстық денсаулық сақтау басқармасы 3,5 млн. теңге, облыстық аурухана 3 млн. теңге көтермеақы берді. Бұдан бөлек, аурухана ай сайын жалға алған пәтеріміздің ақшасын төлейді. Қазір дәрігерлер үйінен пәтер алуға кезекте тұрмын. Облыста бес жыл жұмыс істеуге міндеттімін. Отбасым бар. Зайыбым да болашақ медицина қызметкері, қазіргі уақытта елордадағы Назарбаев университетінде білім алып жатыр”, – дейді жас маман.
Орталықтағы реанимация бөлімшесінде 9 анестезиолог-реаниматолог жұмыс істейді. Оның төртеуі – соңғы екі жылда қатарға қосылғандар.
“Жас мамандардың келгеніне қуаныштымыз, олар жаңашылдыққа, білмекке құштар. Өйткені анестезиология-реанимация бір орында тұрмайтын сала”, – дейді бөлімше меңгерушісі Динара Рахметова.
Жыл басынан облыстың емдеу мекемелеріне келген мамандардың 133-і бір реттік көтермеақы алды.
“Көтермеақы алу үшін дәрігер өтініш беруі тиіс, кейін комиссия қарап, шешім шығарады. Облыс бойынша кадр жетіспеушілігі мәселесі осылайша шешімін тауып жатыр. Қазіргі уақытта 140 маман жетіспейді. Былтыр 280 дәрігер керек болатын. Бұл мәселе көтермеақы мөлшерін арттыру нәтижесінде шешіліп жатыр. Сондай-ақ егер ерлі-зайыптының екеуі де дәрігер болса, пәтердің ақысы толық төленеді. Тек біреуі ғана медицина қызметкері болған жағдайда 50 пайызын өтеп береміз”, – дейді облыстық денсаулық сақтау басқармасы басшысының орынбасары Нұржан Тағаниязов.
Басқарма өкілінің айтуынша, дәрігер ауылға барған жағдайда жергілікті әкімдік үймен қамтиды. Емдеу мекемелері өздері де қосымша қаржылай қолдайды.
“Былтыр еліміздегі алты медициналық университет түлектерімен кездестік. Нәтижесінде жастарға біздің ұсынысымыз ұнап, бірқатары өңірге келді. Қазіргі уақытта акушер-гинекологтар, кардиологтар, онкологтар және хирургтар керек. Жергілікті бюджет есебінен 30 резидент білім алып жатыр. Келесі жылы облыстық бюджет есебінен білім алған 50 маман оқу бітіреді”, – дейді Нұржан Тағаниязов.
Ақерке ДӘУРЕНБЕКҚЫЗЫ,
“Soltüstık Qazaqstan”.