Soltüstık Казахстан
Сәбит Мұқанов атындағы облыстық ғылыми-әмбебап кітапханада “Ауыл өмірінің жаршысы” деген атаумен өткен еске алу кеші биыл туғанына 85 жыл толған қаламгер Ермек Қонарбаевтың өмірі мен шығармашылығына арналды.
Әңгіме жазуды мектеп қабырғасынан бастаған қаламгердің алғашқы туындысы 1959 жылы “Мәдениет және тұрмыс” журналында басылса, тұңғыш кітабы 31 жасында Алматыда жарық көрген. Жазушы өз шығармаларына көрген, естіген оқиғаларын, ел тіршілігін, табиғат суреттерін, тәлім аларлық жайттарды арқау еткен.
Кештің шымылдығын “Асыл мұра” орталығының қызметкері Дәстен Баймұқанов әсем әнмен түріп, Қазақстан Жазушылар одағы облыстық филиалының директоры Жарасбай Сүлейменов, жазушының немере інісі Абылай Балтабаев, қалалық ардагерлер кеңесінің төрағасы Жанкелді Тәжин, шәкірттері Зәуреш Қайырбекова, Зарап Құрманқұлов сөз сөйлеп, жерлесіміздің шығармашылығы мен көзі тірісінде атқарған игі істеріне терең бойлады.
– Ермек аға өте ақжарқын, білімді болды. Өнер десе ішер асын жерге қоятын. Домбыра да тартатын, баянда да ойнайтын. Кез келген шараны мәнді-сәнді өткізетін. Ол кісінің қарапайымдылығы менің жадымда ерекше сақталып қалыпты. Қазақ тілін терең оқытып қана қоймай, өнерге баулыған ұлағатты ұстазымыздың өмірі қамшының сабындай қысқа болса да, көп шәкірт тәрбиелеп, қазақ әдебиетінің қоржынына мол олжа салды, – деді Зәуреш Қайырбекова.
М.Қозыбаев атындағы Солтүстік Қазақстан университеті жанындағы “Foundation” факультетінің тыңдаушылары Жандос Аманбек, Ақсұңқар Өмірбек қаламгердің “Ақ қайың”, “Мәйкен-ай!” өлеңдерін мәнерлеп оқып берді. “Ермек Қонарбаевтың “Туған жер” деген бас-аяғы төрт беттей ғана шап-шағын әңгімесін қайта-қайта оқи бергің келеді. Жас автордың ой түйіні салған жерден көңіліңе қонады. Сол көңілді бөлер көрікті ойды төкпей-шашпай, сылап-сырлап, әп-әдемі жеткізгені үшін жазушыға қатты риза боласың. Қызыға да қызғана қарайсың. Қызғанатының – сол тақырыпты сенен бұрын тауып жазып қойғаны, қызығатының – жас талапкердің жіті байқағыштығы, сезімталдығы керемет”. Бұл – жазушы Сайын Мұратбековтің Ермек ағамыздың шығармашылығы туралы жазған жүрекжарды лебізі. Шарада қаламгердің ауыл өмірін суреттеген шығармалары сараланды.
– Алдында ағасы, артында інісі болмай, жалғыз өскен соң анамыз Ермектің атын атамай “Жалғызым!” – деп еркелететін. Әдебиеттің көрнекті өкілдері Герольд Бельгер, Жарасбай Нұрқанов, Ермек Қонарбаев үшеуі – Ленин орта мектебiнің алтын медальмен бiтiрген алғашқы түлектері. Ауыл өмірін қаламына арқау еткен қаламгер ағамыздың әр әңгімесінен Көктерек, Ыбыраев елді мекендерінің тарихын оқып отырғандай таңғажайып күй кешемін, – деді қаламгердің қарындасы Әзкен Садықова.
Кездесуде жазушының қызы Нұрлыгүл Досанова сөз алып, осындай рухани шара ұйымдастырған кітапхана ұжымына, әдебиетсүйер қауымға ризашылығын білдірді. Жиынға қатысушылар талантын Сафуан Шаймерденов, Ғабдол Сланов, Мұзафар Әлімбаев, Ғафу Қайырбеков, Әбділда Тәжібаев, Тұманбай Молдағалиев бастаған қабырғалы қаламгерлер жоғары бағалаған жерлесіміздің кітаптары топтастырылған көрмені тамашалады.
Самрат ҚҰСКЕНОВ,
“Soltüstık Qazaqstan”.