Soltüstık Казахстан
Мемлекет басшысы Қасым-Жомарт Тоқаевтың Италияға ресми сапары барысында бизнес өкілдерінің қатысуымен “дөңгелек үстел” отырысы өтті. Кездесуде “PROSOL BIOTECH Kazakhstan” ЖШС компаниясының құрылтайшысы Даниэль Бонвицини Петропавл қаласында орналасқан “Qyzyljar” арнайы экономикалық аймағында жемшөп ашытқысын өндіру жобасы іске асырылатынын жеткізді.
Кездесу аясында “Qyzyljar” АЭА басшылығы мен “PROSOL BIOTECH Kazakhstan” ЖШС компаниясы арасында екіжақты меморандумға қол қойылды.
АЭА басшысы Дархан Амриннің айтуына қарағанда, 2023 жылдың қараша айынан бастап компания “Qyzyljar” АЭА-ның резиденті болып табылады. Қазіргі уақытта жобалау-сметалық құжаттамалар әзірленуде. Зауыт құрылысын 2025 жылы аяқтау белгіленген. Инвестиция мөлшері 2 млрд. теңгеге жуық, кәсіпорынның жылдық қуаттылығы – 3000 тонна.
Жемшөп ашытқысы өсімдік және өсімдік емес шикізат субстраттарына негізделген арнайы биомассадан құралады. Ол ауыл шаруашылығы саласында малдарға жемазық ретінде кеңінен қолданылатын болады.
Өмір ЕСҚАЛИ,
“Soltüstık Qazaqstan”.