Soltüstık Казахстан
Сәбит Мұқанов атындағы облыстық қазақ сазды-драма театрында Түркия мемлекетінің Ыстамбұл қаласынан келген режиссер Құбылай Ерделікараның “Сараң” комедиялық спектаклі сахналанды. Режиссердің айтуынша, спектакль жұртшылыққа қызықты болуы үшін бір жарым сағаттық қойылымның 30 минуты биге арналған.
Қолындағы байлығын қара басынан қызғанатын Гарпагонның Элиза есімді қызы, Клеант деген ұлы бар. Гарпагонның сарайына қызметке орналасқан Валердің арманы – Элизаны өзіне жар ету. Бұған қыз да қарсы емес. Сұлу аруға аңсары ауған жігіттің Гарпагонға ұнамайтын бір кемшілігі – ол тақыр кедей. Қалтасында соқыр тиын жоқ Валер Элизаға қол жеткізу үшін барын салады. Гарпагонның көңілінен шығу үшін оның жағымсыз қылықтарына көз жұма қарап, ырқына көнеді. Элизаның бауыры Клеантқа да осы мәселе маза бермейді. Режиссер кедей қызға ғашық болған Клеант пен көк тиыны жоқ жігітті сүйген Элизаның шарасыздығын, ақшадан басқаны елемейтін, өз байлығын жасыру үшін көлеңкесіне күдіктенетін сараң байдың ерсі қылықтары мен ашкөздігін әзіл арқылы жеткізіп, көрерменге ой тастады. Ойландыра отыра сараңдықты махаббат жеңетініне сендірді.
Спектакль соңында ризашылығын білдірген жұрт толассыз шапалақ ұрып, құрметтерін білдірді. Театр директоры Біржан Жалғасбаев қоюшы режиссор Құбылай Ерделікара мен Қ.Жандарбеков атындағы Жетісай драма театрының бас суретшісі, М.Әуезов атындағы Оңтүстік Қазақстан университетінің доценті Бахыт Сраиловты Алғыс хатпен марапаттады. Сонымен қатар ұжымға облыс әкімінің атынан гүл шоғы тарту етілді.
Сержан НҰРТОЛҚЫНҰЛЫ,