“ДЕПУТАТ БОЛЫП ӘР САЛАНЫҢ ЖАНАШЫРЛАРЫ САЙЛАНУЫ ТИІС”

Не үшін депутат болдым?

Алдымен депутат болу – мансап емес, зор жауапкер­шілік екенін түсіну керек. Мен үшін де­путаттық мандат – ең әуелі ха­лықтың сенімі, жауапкершілік жүгі. Жалпы халық қалаулысы атану үшін әділдік, іскерлік, адам­гершілік сынды қасиеттер бір арнада тоғысқаны жөн. Осы­ған дейін аудандық мәслихат­тың үшінші, бесінші, алтыншы ша­қырылымының депутаты бол­дым. Алтыншы шақырылымда мәслихаттың хатшысы қызметін атқардым. Яғни депутаттық жұ­мыс таныс, халықпен жұмыс іс­теуде тәжірибем бар. Осы ретте облыстық мәслихаттың сегізін­ші шақырылымындағы сайлау­ға түсуге ұсыныс түскенде, қар­сы болмадым. Депутат болуда­ғы басты мақсат – ол елдің мұң-мұқтажын билік басындағы­лар­ға жеткізе отырып, соның шеші­лу жолын табу. “Алтын алма, ал­ғыс ал” деген аталы сөз бар. Ха­лыққа қызмет етіп жүрген түрлі сала өкілдері сияқты халық қа­лаулысы да сайлаушыларын тол­ғандырып жүрген мәселені шешіп, алғыс естісе, көңілі өсіп, қанаттанары сөзсіз. Елдің көзі­не тура қарай алатындай адал еңбек ету – менің негізгі ұстаны­мым. Өзім сайланған аумақтың түйткілді мәселесін көтеріп, тұр­ғындардың қалауын жергілікті билікке жеткізіп, оң шешілуіне үлес қоссам, өз ұстанымыма адал­дық танытқаным.

Елді мекендерді жиі аралай­мын, тұрғындардың көз алдын­дамын. Ауылдағы ағайынды тол­ғандырып жүрген мәселені тыңдай отыра, оларды атқарып жатқан жұмысыммен танысты­ра­мын. “Береген қол перде тү­реді” демекші, ашықтық сайлаушылар мен депутаттардың ара­сын жақындатады. Олар көтер­ген мәселе шешімін тауып жат­са, депутатқа ғана емес, бола­шаққа деген сенімі артады, “ес­ти­тін Үкімет” бар екеніне сенеді. Туындаған мәселелерді шешу­де жергілікті атқарушы билікпен тығыз жұмыс істесек, көп шаруа­­ның басы қайырылады. Ең бастысы, бастаған істі аяқсыз қал­­дырмау керек.

Сайлаушыларға қандай уәде бердім?

Қазіргі таңда сайлауалды бағдарламадағы, тұрғындар­мен кездескен кезде көтерілген мәселелерді бағдар етіп, жұмыс істеп жатырмын. Соның бірі – Айыртау аг­ротехникалық кол­леджін жатақ­ханамен қамта­масыз ету. Соң­ғы екі жылда студенттердің саны 175-тен 393-ке көбейді. Балалар шал­ғай елді мекендерден келіп оқып жатыр. Ең­бек на­рығында сұранысқа ие жаңа ма­ман­дықтар аштық. Со­ның бар­лы­ғы жастар кәсіптік бі­лім алып, елдің дамуына өз үле­сін қоссын деген ниеттен туын­дады. Болашақ мамандарға сапалы білім беру үшін қымбат құрал-жабдықтар сатып алып, зертха­налар ашып жатырмыз. Са­палы кадр – даму кепілі. Сон­дықтан білім қуып келген жас­тар­ды жа­тақханамен қамту аса өзек­ті мәселеге айналып отыр. Бұл жөнін­де аудандық білім бөлімі, облыстық бі­лім басқармасы басшысына сауал­дар жолдадым, ұсыныс­тар жаса­дым. Аудан орталы­ғында бұрынғы агротехникалық колледж­дің иесіз қалған үш қа­бат­ты жатақханасы тұр. Сол ғи­маратты облыстық білім бас­қармасы өз балансына алып, бізге беретіні жайлы хабар кел­ді. Бірақ нақты нәтижеге қол жет­кізе алмай отырмыз. Айыртау аудандық сәулет, құрылыс, тұр­ғын үй-коммуналдық шаруашы­лы­ғы, жолаушылар көлігі және автомобиль жолдары бөлімі ба­ланстарындағы ғимараттың құ­жатын таба алмай, әуре-сарсаңға салып отыр. Егер құжат табылса, апаттық жағдайдағы жатақхананы жөндеуге не бол­ма­са, сүріп тастап жаңа ғимарат салуға қаржы бөлінер еді. Аяққа тұсау болып отырған осы мәсе­ле қашан шешілетіні белгісіз.

Сонымен қатар Бәйтерек, ПТШ, Панфилов, Мир, Юби­лейный көшелерінің тұрғында­ры жазған хатқа сәйкес шағын футбол және балалардың ойын алаңын орнату мәселесі пысық­талуда.

Айыртау ауданы туристік ай­мақ екені көпшілікке мәлім. Біз­дің жақтың көп жері ұлттық қо­рық тізіміне енген. Дегенмен тұрғын­дар жер қойнауындағы қиыр­шық тастарды өндіріп, сапасы тө­мен жолдарға төсей алмай отырғанымызға назалы. Бұл – Парламент Мәжілісінде көтері­летін мәселе. Сондықтан сол жақтағы әріптестерімізге үміт артып отырмыз.

Қай уәдемді орындадым?

Халық қалаулысы деп аты айтып тұрғандай, олар халық­тың мұңын мұңдап, жоғын жоқ­таушы тұлғалар. Көшелеріміз асфальтталып, жарықтандыру жұ­мысы жүргізілді. Ауызсу мә­селесі де шешімін тауып жатыр. Елді мекендердің біразы қазір тәу­лік бойы су ішіп отыр десек, артық айтқандық емес. Бұрын­ғымен салыстырғанда бүгінгінің келбеті тіпті бөлек. Ертеректе кө­шедегі суға тұтас ауыл мойнын созып отыратын. Арбалап та, ар­қалап та тасыды. Осының бар­лы­ғын бюджетке ұсынып, тал­дап-таразылап жүрген де осы – халық қалаулылары. Соңғы жыл­дары халықтың әлеуетін кө­теру үшін ауқымды жұмыстар ат­қарылды. Ең бастысы, халық­тың қолын аузына жеткізетін мем­лекеттік бағдарламаларды насихаттап, кәсіпкерлікті дамы­ту мен қолдау жолында көп ша­руаны тындырдық деп айта ала­мын. Әрине, бұл жұмысқа тоқ­тау жоқ, өмір ағысы, халықтың талабына сәйкес жалғаса бе­ретіні анық.

Мысалы, Саумалкөл – Сырым­бет – Светлое жолын жөн­деу талай жыл көтерілген мәсе­ле еді. Өткен жылы 771 млн. тең­ге сомасында қаражат бөлінді, биыл 1 млрд. теңгеден астам қа­ражат қарастырылды. Қазір Сау­малкөл ауылының тұрғында­рын жалпы ұзындығы 57,677 километр магистральдық кәріз құбырын, 3 кәріз сорғы стансаларын, тоз­ған кәріз коллекторын қайта жа­ңарту мәселесі қатты алаң­да­тып отыр. Қазіргі уақытта жо­балау-сметалық құжаттама даяр, осы мақсаттарға облыс­тық бюджеттен 100 млн. теңге бөлінді. Жалпы бұл мәселені толық шешу үшін 3,6 млрд. тең­ге қаржы қажет. Көп уақыттан бері аудандық емхананың ғима­ратын жөндеу және жылу жүйе­сін, пластик терезелерді ауыс­ты­ру мәселесі шешімін таппай тұрған еді. Тиісті қаржы бөлін­геннен кейін өткен жылдың күзінде жөндеу жұмыстары аяқталды. Ал биыл аурухана ал­дына асфальт төсеуге 20 млн. теңге бөлінді. Сонымен қатар Саумалкөл ауылының көшеле­ріне қиыршық тас төсеуге 70 млн. теңге қарастырылған.

Халық маған сене ме?

“Ауыл – ел бесігі” бағдарла­масы аясында Дәуқара орта мектебіне, Ақан мектеп-бөбекжай-бақша кешеніне және Ново­светловка орта мектебіне 400 млн. теңге сомасына жөңдеу жұмыстары жүргізілді.

Қараша айында Арықбалық ауылында көшпелі қоғамдық қа­былдау ұйымдастырылды. Онда тұрғындар 2024 жылы ауылдың құрылғанына 200 жыл толатынын айта келе, орталық саябақты жаңартуға жәр­дем­десуді сұрады. Биыл мүд­делі тұлғалардың бірлескен күш-жігерімен Арықбалық ауылындағы саябақты қалпына келтіруге облыстық бюджеттен 45 млн. теңге қаржы бөлінді.

Халықтың сеніміне ие болу – мәртебе. Бірақ ол – көптің ба­сына қонбайтын бақ. Менің ойымша, сайлаушылардың се­ні­міне селкеу түсірмес үшін әр саланың жанашырлары депу­тат болып сайлануы тиіс. Өзі бүге-шүгесіне дейін білетін са­ла­ның олқылықтарын түзетуге атсалысатын адам нәтижеге қол жеткізгенше тынбайды. Егер осындай жанашырлардың қатары қалың болса, ел дамуы­на өзгеріс әкеледі. Тұрғындар сөзге емес, оң өзгеріске сенеді. Сондықтан халықтың маған қан­шалықты сенетінін сайлаушы­ларым ғана айта алады. Жалпы тұрғындардың халық қалаулы­ла­рына деген сенімі, көзқарасы әртүрлі. Жасыратыны жоқ, де­путаттардың тәжірибесі, еңбек ету қабілеті, белсенділігі, жұмыс өнімділігі бірдей емес. Сон­дық­тан депутат халық сенімін қан­шалықты ақтап жүргенін халық­тан артық ешкім бағалай ал­майды-ау. Халықтың ұсынысы, тілегі орындалса, сайлауалды бағ­дарлама уақытылы жүзеге асса, тұрғындардың сенімі ақ­талғаны деп білемін. “Халық айтса, қалт айтпайды” демекші, халықтан асқан сыншы да, әділ қазы да жоқ. Сондықтан халық сенімін ақтау үшін аянбай еңбек ететінім анық.

Дайындаған

Арайлым БЕЙСЕНБАЕВА,

“Soltüstık Qazaqstan”.