Soltüstık Казахстан
Петропавл қаласының 67 жастағы тұрғыны – этно стильдегі киім үлгілерін тігудің шебері. Көп жыл бойы ұлттық нақыштағы киім тіккен Марзия Мордвинцева зейнетке шықса да, сүйікті кәсібінен қол үзген емес.
Он саусағынан өнер тамған ісмер жан қорабынан ине-жібі мен қажетті маталарын шығарып, татар халқының ұлттық киімінің ажырамас бөлігі – тебетейдің түр-түрін тігеді. Оның саны қазір шамамен 50-ден асады. Ою-өрнекпен кестелеп, әшекей тастармен безендіргенде көздің жауын алады.
“Дуслык” татар-башқұрт мәдени орталығының белсенді мүшесі бас киіммен қатар этно стильдегі сырт киімдерді де тігеді. Әр мерекелік іс-шараға арнап әзірлеген түрлі дизайндағы ұлттық киімдері сұранысқа ие.
– Әз-Наурыз – ерекше жақсы көретін мерекелерімнің бірі әрі бірегейі. Оны жаңару мен гүлдену мейрамы деп түсінемін. Кез келген қыз-келіншек Ұлыстың ұлы күнінде гүлдей жайнап, жарқырап жүруі шарт. Сондықтан түрлі дизайндағы көйлектер мен тақияларды, ұлттық нақыштағы басқа да киімдерді киген жөн, – дейді Марзия Мордвинцева.
Қолөнер шебері, бұдан бөлек, ваза, картина сынды сәндік қолөнер бұйымдарын да жасайды. Жақында киізден панно, қоржын, акссесуарлар дайындады.
Диас АЯҒАН,
“Soltüstık Qazaqstan”.