Ізгілік нұрын шашқан

Soltüstık Казахстан

 Kyzylzhar_akparat@mail.ru

Отбасылық үлгідегі балалар ауылының тәрбиеле­нушілері жыл сайын Наурыз мерекесін асыға күтеді. Оның өз себебі бар. Біз мереке аясында түрлі мерекелік шараларға қатысып, концерттік бағдарламаларды тамаша­лай­мыз, дәмі тіл үйіретін бауырсақ, наурыз-көжеден, құрт, еттен ауыз тиеміз.

Наурызнаманың екінші “Қа­йырымдылық” күніне орай Ға­бит Мүсірепов атындағы об­лыс­тық ба­лалар және жасөс­пірімдер кі­тапханасының қыз­мет­керлері біз­дер үшін “Көк­темгі мереке: бей­бітшілік пен жақсылық жар­шы­сы” атты ме­рекелік бағдар­ла­ма әзір­леді. Кіреберісте бізді кі­тапхана қыз­меткерлері ұлттық киімде ыс­тық бауырсақпен қар­сы алды. Ме­рекелік іс-шара “Ту­ған жер” би ан­самблінің орында­уында­ғы “Қара жорға” биімен басталды. Содан кейін Қыдыр ата сахнаға шығып, балаларға ақ батасын берді.

Тәрбиеленушілер үшін кі­тап­хананың оқу залдары бо­йынша экскурсия өткізілді. Он­да біздің ба­лаларға киіз және жүнмен жұ­мыс істеу, құрақ көрпе тігу, кө­зешілік іс, наурыз-көже тағамын дайындау, қазақ­тың ұлттық ойын­­дары “Асық ату”, “Бес асық”, “Тоғызқұма­лақ” бойынша шебер­лік сағаттары өткізілді. Әр қол­өнер бөлмелеріндегі кітап көр­мелері балаларды қызық­тырды.

Наурыз-думан мұнымен шек­телмейді. Қаламыздағы бі­лім ордаларының өкілдері бізге ме­рекелік көңіл-күй сыйласа, отба­сылық үлгідегі балалар ауы­лы­ның тәрбиешілері де бойымызға рухани құндылық­тарды сіңіріп, Наурыздың мәнін ашуға тыры­сып бақты.

Наурыз мейрамы ғасырлар бойы табиғат пен адам жаны­ның жаңаруының символы бол­ды, адамның өмі­рі­не, көзқарас­та­ры­на әсер етті. Тек көктемнің ғана емес, ең әуелі ізгілік пен жақсы­лықтың мейрамы болған Ұлыс­тың осы бір ұлы күні жер бетін­дегі қанды соғыстар, дау-жан­жалдар тоқтатылып, адам­дар бір-біріне деген өкпе-реніштерін ұмытып, кешірімге келіп, та­тула­сып, табыса біл­ген. Хал­қы­мыз мол дастарқа­нын жа­йып, ақжар­қын көңілмен жүз­де­сіп, дәм та­тысып, өткен-кет­кен­нен сыр тар­тып, барша адам ба­ласына жақ­сылық, аманшылық тілеп, жас­тарға ақ баталарын берген.

Отбасылық үлгідегі бала­лар ауылында тәрбиеленіп жат­қан балалардың бірінің анасы, енді бірінің әкесі жоқ. Ең жақын адам­дарымыздан жырақта бол­сақ та, біз жүрек түкпіріміз­дегі мейі­рім­ділік, қайырымдылық сынды асыл сезімдерімізді ая­лап келе­міз. Наурыз мереке­сін­де бізді ар­найы шақырып, қонақ етіп жат­қан ұжымдарға ерекше алғыс ай­тамыз. Біз осын­дай ізгілік нұрын шашқан мейрамдарда еліміздің ертеңі екенімізді одан сайын се­зіне түсеміз.

Ангелина НОВОЛЕТОВА,

отбасылық үлгідегі балалар ауылының тәрбиеленушісі.