Soltüstık Казахстан
Солтүстік Қазақстан мал және өсімдік шаруашылығын ғылыми-зерттеу институтында мал дәрігерлеріне арналған семинар өтті. Бұл шараның мақсаты – ветеринарларға сырттан әкелінген асыл тұқымды малдарды күтіп-бағуды үйрету.
Облыстық ветеринария басқармасының басшысы Жанат Әміржановтың айтуынша, сырттан әкелінген асыл тұқымды малдардың ауруы да, оның алдын алу әдістері де өзгеше. Сол себепті Астанадан профессорларды арнайы шақыртып, жергілікті мамандардың біліктілігін арттыру көзделген.
Семинарға өңірдің түкпір-түкпірінен 30-ға жуық мал дәрігері қатысты. Оларға теориялық дәріс берушілердің бірі – С.Сейфуллин атындағы Қазақ агротехникалық университеті “Ветеринарлық медицина” факультетінің профессоры Алтай Үсенбаев.
– Бұл өңірде мал шаруашылығы, оның ішінде сауынды технологиялар жақсы дамып келеді. Фермалар қарқынды түрде салынып жатыр. Мамандардың мұң-мұқтажын білу үшін тығыз байланыс орнатқан жөн, – деді Алтай Үсенбаев.
Жалпы семинар екі күнге созылды. Алғашқы күні қатысушылар теориялық білімдерін толықтырса, келесі күні шаруа қожалықтарына барып, тәжірибелік дағдыларын жетілдірді.
Аманжол НҰРТАЗИН,
“Soltüstık Qazaqstan”.