Жас қырандар – балапан

Soltüstık Казахстан

 Kyzylzhar_akparat@mail.ru

Біздің өңірімізде айтыс өнеріне ден қойып жүрген оқушылар аз емес. Солардың денінің аудандарда шоғырланғаны қуантады. Облыс орталығында “Туған жерім – мақтанышым” деген атаумен өткен оқушылар айтысына қатысқан 30 талапкер жырдың отын маздатып, жиналғандарды шуақты шумақтарымен сүйсінтті.

Сөз додасына барлық аудан­дар мен Петропавл қаласынан ірік­телген оқушылардың қатысқа­нын айта кеткен жөн. Ерік Асқаров атын­дағы облыстық ақындар мек­тебінің ұстаздары қазан айының басында аудан-ауылдарды ара­лап, домбыра тартуға әуес, өлең жазуға құштар талапты балаларға облыстық оқушылар айтысына қатысуға жолдама берген болатын. Бұл игі бастама облыстық білім басқармасының қолдауымен “Төрт тоқсан – төрт өнер” ұлттық мәдени-ағартушылық жобасы аясында ұйымдастырылды.

Жыр бәйгесі шамамен 5 сағат­қа жалғасып, үміткерлер көрермен­дерді өнерлерімен тәнтті етті. Жас дарындар туған ауылдарын, олар­дың әсем табиғатын, Қызылжардан шыққан ұлы тұлғаларды жырға қос­ты. Нәтижесінде аламанның бас жүлдесін Аққайың ауданындағы Дайындық ауылынан келген Бека­рыс Әділжан жеңіп алды. 1-ші орын Абай атындағы қазақ мектеп-гим­назиясының оқушысы Серік Мә­динаға, 2-ші орын қызылжарлық Сұлтан Жарқынұлы мен аққайың­дық Сезім Жомартқа, 3-ші орын тайыншалық Қайрат Әбілмансұр, пет­ропавлдық Дүйсен Ернар және қызылжарлық Қажымұрат Нұр­тө­реге бұйырды.

Қожаберген жырау, Игібай Әлі­баев, Мағжан Жұмабаев атын­дағы арнайы жүлделер уәлихановтық Мерей Балташқа, Жамбыл ауда­ны­нан келген Мөлдір Сәрсенге, Тимирязев ауданының мектеп оқу­шысы Өтеген Аңсарға табыс етілді. “AMANAT” партиясы облыстық филиалының өкілі Роза Шәкенова жан-жануарлар айтысының үлгісін көрсеткен Тайынша ауданындағы Красная поляна мектебінің оқушы­ла­ры Виктор Вагнер мен Валерий Ботановқа және оларды даярлаған ұстаздары Аягөз Белгібаеваға Ал­ғыс хат пен сый-сияпат табыс етті. Та­лапкерлердің барлығына “Бал­дәурен” және “Бөбек” лагерьлеріне жолдама, ақшалай сыйлықтар бе­рілді.

Алаштың ардақты перзенті Мағжан Жұмабаев бір өлеңінде: “Жас қырандар – балапан, Жайып қанат ұмтылған”, – деп жырлапты. Болашақта айтыс ақыны болуды армандап жүрген өрендердің талаптарына қуанып, бәсі бұдан да биік бәсекелерде асықтарының алшысынан түсуін тіледік.

Аманжол ЗАҒЫПАР,

“Soltüstık Qazaqstan”.

Суретті түсірген

Самат БАЙҒАЗЫ.