Soltüstık Казахстан
Үй жануарларын есепке алу қағидаларына және есепке алуға жататын үй жануарларының тізбесіне сәйкес 2023 жылғы 1 қыркүйектен бастап, үй жануарларының иелері есепке қоюға міндетті.
Облысымызда жануарларды есепке алу жөніндегі “ТАNBA” ақпараттық сервисі жұмыс істейді. Онда бүгінгі күнге дейін 6950 үй жануары есепке қойылды. Бұл мәлімет күн сайын өзгеріп жатыр.
Бүгінгі таңда жануарларға чипті Петропавл қаласының ветеринариялық клиникалары салады. Аудандар мен Петропавл қаласының ветеринариялық стансалары облыстағы халықтың әлеуметтік осал топтарының үй жануарларына чипті тегін салады.
Чип салу жануарларға жауапкершілікпен қарауға ықпал етеді және арнайы чиптерді қолдана отырып, жануарларды таңбалаудың қауіпсіз және заманауи әдістерінің бірі болып табылады. Жануарға чип салу – ауырсындырмай жасалатын процедура.
Заманауи бірдейлендіру әдістері жануарлардың ауысып кетпеуін қамтамасыз етеді, құтырма ауруына және басқа да жұқпалы ауруларға қарсы вакцина егілмеген жануарлардың тасымалдануына жол бермейді. Чип салу – жануарларды иеленуге қатысты даулар туындаған кездегі маңызды дәлел.
Чип дербес 15 таңбалы сандық кодтан тұрады, ал жануар мен оның иесі туралы ақпаратты сақтау үшін чип салынған жануарлардың электрондық дерекқорлары пайдаланылады. Он бес сандық ұяшық жануардың өмір бойы қауіпсіз және сенімді түрде бірдейлендірілуіне, алдағы жүз жыл ішінде нөмірдің қайталанбауына кепілдік береді, ал биоүйлесімді шыны микрочиптің жылжып кетуіне жол бермейді. Демек әр жануар өмір бойы сақталатын бірегей сәйкестендіру кодын алады. Оны толықтыру немесе өзгерту мүмкін емес. Оның өзгермейтіндігі – микрочип нөмірлерінің жалған болмауының кепілі. Чиптен ақпаратты оқу саны шектелмеген. Микрочип қуат көзін қажет етпейді және өздігінен сәуле таратпайды, тек сканерлегенде көрінеді.
Құрметті үй жануарларының иелері, осы мәселеге жауаптылықпен қарап, үй жануарларына қамқорлық жасауды сұраймыз. Сіздер чип салу мәселесі бойынша өз ауданыңыздың ветеринариялық стансасына жүгіне аласыз.
Мадиан ТҰЙҒЫМБАЕВА,
облыстық ветеринария басқармасының ветеринариялық-санитариялық іс-шаралар бөлімінің бас маманы.