Soltüstık Казахстан
Облыс орталығындағы №2 арнайы мектеп-интернатта күміс көмей әншілермен, еліміздің намысын қорғап жүрген спортшылармен, танымал кәсіпкерлермен және қоғам қайраткерлерімен кездесулер тұрақты түрде өткізіліп тұрады. Тәуелсіздік күні қарсаңында өткізілген осындай жылы жүздесуге белгілі қоғам қайраткері, “Mağjan” журналының бас редакторы Жарасбай Сүлейменов пен облыстық “Молодежная – Жастар” газетінің бас редакторы Ақ-Ләйлек Жаукина шақырылды.
Іс-шара барысында білім ордасының директоры Ризабек Какпенов баспасөз әрқашанда қоғамдық пікір мен өзекті де маңызды ақпараттың көзі болып табылатынын ерекше атап өтті. Технология дамыған заманда өз қалыбын сақтаған газет-журналдарға әрқашан сұраныс жоғары.
Шынында да, газет – сауаттылық пен эстетиканың жаршысы. Тіл ұстартып, адамға тәрбие беруші құрал. Осы ретте құрметті қонақтар жас журналист еңбек жолын газет-журналдарда бастағаны жөн деген ойларын айтты. Мәселен, Қытайда мектеп оқушыларының жазуы әсем болуы үшін сиялы қаламмен жазуға үгіттеген. Себебі қалам мен сиялы қаламның айырмасы бар. Біреуі – дайын өнім, екіншісі еңбек. Ал сияға малып, мәнерлеп жазу – тәрбие. Осы тұрғыдан келгенде газеттің бәсі басым екені анық.
Кездесу соңында мектеп ұжымы Жарасбай Сүлейменов пен Ақ-Ләйлек Жаукинаға тұшымды әңгіме айтқандары үшін алғыстарын білдірді. Сондай-ақ қонақтарға мектеп оқушылары дайындаған Алғыс хаттар мен кәдесыйлар табыс етілді.
Анар НҰРҒОЖИНА,
№2 арнайы мектеп-интернат директорының оқу ісі жөніндегі орынбасары.
Лариса КОВТУН,
№2 арнайы мектеп-интернаттың тарих пәнінің мұғалімі, дефектолог.