Soltüstık Казахстан
Оқушылар сарайында технология сурет мұғалімдеріне, сонымен қатар сәндік-қолданбалы шығармашылық пен бейнелеу өнері ұжымдарына жетекшілік ететін қосымша білім беру педагогтарына арналған облыстық оқу семинары өтті. Жыл сайын ұйымдастырылатын жиынға өңір аудандарынан жиырмаға жуық маман қатысты.
Шара сурет салудың бастапқы кезеңдеріндегі жұмыс технологиясы туралы шеберлік сағатынан басталды. Қосымша білім беретін ұстаздар мұнда түрлі композиция жасауды және заманауи технологияларды игере отырып, қиялдағы дүниені қағазға түсірді. Бұл мамандықтың қыр-сырын жақынырақ тануға жол ашады.
Облыстық балалар мен жасөспірімдер шығармашылығы орталығы директорының орынбасары Ирина Колодаеваның айтуынша, семинар спикерлері ұсынып отырған материалдар қосымша білім беру педагогтарының кәсіби қызметінде көмегі зор. Тіпті таптырмас көрнекілік деуге болады. Бұл семинар арқылы олар кәсіби шеберлігін арттырады және тәжірибе алмасады.
Семинарға қатысқан педагогтар мұндай пайдалы шараларды жиі өткізу қажеттігін айтты.
– Осындай семинарлардан алған тәжірибемізді орталықтағы балалармен бөлісеміз. Мысалы, бүгін әртүрлі бағытта сурет салуды, заманауи техникаларды қолдануды үйреніп жатырмыз, – дейді Айыртау аудандық қосымша білім беру орталығының оқытушысы Мейірбек Тоқанов.
Ләзиза МЫРЗАНТАЙҚЫЗЫ,
“Soltüstık Qazaqstan”.