Soltüstık Казахстан
Биыл еліміз Тәуелсіздіктің 30 жылдығын атап өтеді. Қазақстан бұл белеске елеулі жетістіктермен жетіп отыр. Еліміздің Туы мен “бірлік” деп аталатын “төлқұжатын” қазір әлемнің барлық республикалары біледі. Оларды кең-байтақ елде тату-тәтті өмір сүріп жатқан көпэтносты халқымыздың ынтымағы қызықтырады.
Қазақстан халқы Ассамблеясы елімізде 100-ден астам ұлт пен ұлысты біріктірді, бір шаңырақ астына ұйытты. Осының арқасында тағдырдың жазуымен қазақ жерін құтты мекеніне айналдырған түрлі этнос өкілдері елімізде бейбітшілік пен келісімнің орнығып, дамуына өз үлестерін қосып келеді. Еліміз егемендікке қол жеткізгеннен кейін өткен ғасырдың отызыншы жылдары жазықсыз атылып, саяси қуғын-сүргін мен ашаршылық құрбандарына айналған боздақтардың есімдері ақталды. Қазақтың Әлихан Бөкейханов, Ахмет Байтұрсынов, Мағжан Жұмабаев, Мұстафа Шоқай, Міржақып Дулатов сынды ардақты ұлдарымен қатар, репрессияға ұшырап, басқа елдерден Қазақстанға айдалған өзге этнос өкілдері де ақталып, олардың ұрпақтарына еркін өмір сүру мүмкіндігі берілді.
Ассамблеяның қолдауымен “Представители этносов Казахстана в искусстве и культуре: энциклопедия персоналий” кітабы басылып шықты. Онда баршамыздың мәдениетіміз жайлы құнды деректер келтірілді.
Бүгінде дарынды жастарымыз әлем сахналарында Қазақстанның мерейін абыроймен қорғауда. Біздің мақтан етер жетістіктеріміз көп, алға қойған мақсат-мұраттарымыз да орасан. Елімізде жастарға жарқын болашақ құруға бар мүмкіндіктер беріліп отыр. Еліміздің түкпір-түкпіріндегі түрлі этностар қазақ халқының ұлттық құндылықтарын қастерлеп, қолдап, өз мәдениетін қатар жаңғыртуда. Ассамблея еліміздің әр азаматына мемлекетіміздегі өзгерістерге үлес қосуға, мемлекеттік тілді дамытуға, оны меңгеруге, бұртұтас халықты қалыптастыруға жетелейді.
Валентина КОРНЕВА,
“Коперник” облыстық поляк мәдени орталығы” қоғамдық бірлестігі төрағасының орынбасары.