Сегіз сері атындағы қазақ халық аспаптары оркестрінің “Күй – тәңірдің күмбірі” атты концерті өтті. Өңір тұрғындары құлақтан кіріп, бойды алған тәтті күйлерден сусындап қайтты.
Түркештің “Көңіл ашарымен” басталған концерт көрермендерге ерекше көңіл күй сыйлады. Асхат Ғалеев домбырада, Руслан Асылхан сыбызғыда жеке өнер көрсетті. Халықаралық және республикалық байқаулардың жүлдегері қобызшы Жәмила Мұстафина Ықылас Дүкенұлының “Жез киік” күйін орындады.
Көпшілік тамаша кештің куәсі болды. Дина Нұрпейісованың “Әсем қоңыр”, “Он алтыншы жыл”, Дәулеткерей Шығайұлының “Құдаша”, Сүгір Әліұлының “Ыңғай төк”, Қазанғап Тілепбергенұлының “Жаса, Ақжелең”, Құрманғазы Сағырбайұлының “Ақбай”, “Сарыарқа” сынды шығармалары жиналған жұртшылықты бір желпінтіп тастады. Кеш соңында домбырашылар Бәйімбет Құбайдолла, Асхат Ғалеев пен Мақсат Қонақпаев оркестрдің сүйемелдеуімен көрермендерге күйден шашу шашты.
Рабиға ЕРАЛЫ,
“Soltüstık Qazaqstan”.