Soltüstık Казахстан
Мектеп қабырғасында оқитын, жұмыс істейтіндер үшін жаз айлары – демалыстың, қызықты сәттердің мерзімі. Әсіресе оқушылар арқасын кеңге салып, дем алып жатқаны сөзсіз. Жазда кейбір орталықтар, мекемелер жұмысын ширата түседі. Солардың қатарында “Серпер” өнер мектебі бар. Балалардың бос уақытын ұтымды өткізу, шығырмашылық қабілеттерін дамыту, рухани азық беру үшін түрлі шаралар өткізеді.
Жаздың жайма шуақ көріністерін қағаз бетіне түсіру арқылы қиял мен шығармашылық әлеміне тарту үшін сурет сыныбының ұстаздары Арайгүл Әбдікеева мен Жадыра Шәріпованың жетекшілігімен пленэрлік жұмыстар атқарылды. Хореография бөлімінің оқушыларына “Би әлемі” және “Қозғал да қат” атты шара ұйымдастырылды. Айжан Досай, Гүләйім Хасымханқызы мен А.Сұлтанова жеткіншектердің дене бітімін әдемі қалыптастыру үшін түрлі ойындар, жаттығулар мен пластикалық қимылдарды үйретеді.
Музыкалық бөлімде аспапта ойнауға үйреніп жүргендер түрлі байқаулар мен сайыстарға дайындалады. Шараларға қатыса отырып, балалардың үлкен тағылым алғаны сезіліп тұрады. Жазғы демалысты пайдаланып, шәкірттерді аспаптарға қызықтыра түсеміз. “Домбыра күні” мектептегі “Жігер” домбырашылар ансамблі “Өнерім – өрісім” атты шығармашылық кеш ұйымдастырды.
Домбыраны жетік меңгерген өнерпаздардан құралған “Жігер” ансамблі бірнеше жылдар бойы республикалық, халықаралық байқауларда биік белестерден көрініп жүр. Репертуары да мол. Жетекшісі – Гауһар Еркібаева.
Өнер мектебінде концерттік шараға жиналған жас жеткіншектер “Ғасырлар үні” мен “Мұрагер” ұлт аспаптар ансамбльдерінің, “Айтұмар” мен “Кабриоль” хореографиялық топтарының, “Сырлы саз” қобызшылар ұжымының өнерлерін тамашалады. Кеш аудандық Мәдениет үйінде өткізілді. Оның дәлізінде көрме ұйымдастырылып, оған қойылған гравюра, тоқыма, батик, майлы бояу, графикалық суреттер көрермендерге ұнады.
Осының барлығы бағыт беруші ұстаздардың қажырлы еңбектерінің арқасы. Оқушылардың жазғы демалысын мәнді де мағыналы ету үшін күн ұзаққа олармен жұмыс істейді.
Оқу жылы басталмас бұрын өнер мектебінің ұжымы өзіне талапты да талантты балаларды тарту үшін “Ашық есік” күнін өткізеді.
Ләззат ЖЕТПІСБАЕВА,
“Серпер” өнер мектебінің оқу ісі жөніндегі меңгерушісі.
Ақжар ауданы.