№ 59 (21276) Сейсенбі, 22 мамыр 2012 жыл
Тоқтар ЗІКІРИН, “Солтүстік Қазақстан”.
Биылғы көктемгі егіс жұмыстары зор ұйымшылдықпен өткізілуде. Тұқым себуді жылдағыдан бірер күнге бұрын бастаған облыс диқандары бүгінде егіс алқаптарының бестен бір бөлігіне ырыс дәнін сеуіп үлгерді.
Облыстық ауыл шаруашылығы басқармасының кешегі күнге дейінгі жедел деректері бойынша, жоспарланған 3834,9 мың гектардың 832,3 мың гектарына дәнді дақылдар тұқымы сіңірілді. Егіс алқаптарының үштен біріне жақын дән сеуіп үлгерген Аққайың, Айыртау, Мағжан Жұмабаев және Қызылжар аудандарының егіншілері ширақ қимыл танытуда. Әзірге 12,7 және 11,0 пайыздан ғана егіс жұмысын атқарған Тимирязев пен Ғ.Мүсірепов атындағы аудандардан басқаларының үзеңгі қағыстары қатар келеді.
Соңғы жылдары айрықша көңіл бөлініп отырған майлы дақылдар тұқымын себу өте жоғары қарқында атқарылуда. Бүгінде жоспарланған 328,0 мың гектар алқаптың 211,1 мың гектарына ырыс дәні сіңірілді. Ақжар ауданы өзіне жүктелген тапсырманы қазірдің өзінде төрт есе асыра орындаса, Айыртау мен Аққайың аудандары жоспарлы межеден көрініп отыр. Сол сияқты Қызылжар, Тайынша және Есіл аудандарының диқандары да бұл жұмысқа ерекше серпін беруде.
Кешегі күнге дейін облыста картоптың 83,0 пайызы, көкөністердің 72,7 пайызы отырғызылды. Сонымен бірге 13,4 мың гектар біржылдық, 28,9 мың гектар көпжылдық екпе шөптер себілді, ал сүрлемдік жүгері себуді әзірге Қызылжар және Тайынша аудандары ғана қолға алды.
Жандос НАУРЫЗБАЕВ,
